Hytaýyň Milli kosmos müdirligi Täze ýyl sowgady hökmünde Marsdan düşürilen dört sany täze suraty neşir etdi. Fotosuratlar 2021-nji ýylyň fewralyndan bäri Gyzyl planetada «Çžurong» marsahody bilen bilelikde işleýän «Týanwen-1» kosmos saýawany tarapyndan düşürildi. Fotosuratlar CNSA saýtynda elýeterli.
Suratlarda Marsyň fonunda düşen saýawanyň bir bölegini, «Týanwen-1» orbital apparatyň şekilini, Marsyň üstüniň suratyny düşürýän «Çžurong» marsahodyny we planetanyň doňdurylan suwdan we kömürturşy gazyndan ybarat bolan Demirgazyk polýar şyrdagynyň şekilini görmek bolýar.
Müdirlik enjamlaryň ikisiniň hem kadaly işleýändigini we howpsuzlykdadygyny görkezmek üçin suratlary neşir etdi.
Polýar buzly şyrdakly suratda sowet konstruktory Sergeý Korolýowyň adyny göterýän krater we Olimpiýa meýdany görünýär. Marsahoddan düşürilen suratda planetanyň mahsus relýefini görmek bolýar.
«Týanwen-1» orbital apparatyň ady «Asmana sowallar» diýlip terjime edilýär. 31-nji dekabra çenli ýagdaýa görä, ol 526 gün bäri işleýär we Ýerden 350 mln km uzaklykda ýerleşýär. Suratlary ibermeklik takmynan 19,5 minut wagt aldy.
«Çžurong» marsahody gadymy hytaý mifologiýasyndaky ýalyn hudaýyndan at alýar. Ol Gyzyl planetanyň ady bilen ugurdaş gelýär. Ol planetada 225 mars güni iş alyp barýar (Mars planetasyndan bir günüň ortaça dowamlylygy 24 sagat 37 minut). Bu döwürde marsahod 1400 m aralyk geçdi.
Işiniň tutuş dowamynda enjamlaryň ikisi Mars barada 560 Gb maglumat çöpledi.