14-16-njy oktýabrda Hytaýyň Pekin şäherinde Birleşen Milletler Guramasynyň durnukly ulag ulgamy boýunça ikinji Ählumumy maslahaty gibrid görnüşinde geçirilýär. HHR-iň Başlygy Si Szinpiniň çakylygy boýunça Türkmenistanyň Prezidenti Gurbanguly Berdimuhamedow bu maslahata göni wideoaragatnaşyk arkaly gatnaşdy.
«Durnukly ulag ulgamy, durnukly ösüş» mowzugy bilen geçirilýän ýokary derejeli maslahatyň gün tertibi ulag ulgamy ýaly möhüm ugurda hyzmatdaşlyk etmegiň meseleleriniň giň toplumyny öz içine alýar. Ol döwlet we hökümet baştutanlaryny, BMG-niň ulgamynyň, şeýle-de ÝHHG-niň, YHG-nyň, ŞHG-niň, GDA-nyň, Ýewropa komissiýasynyň hem-de iş ulgamy ulag pudagynyň ähli ugurlaryna dahylly beýleki abraýly halkara guramalaryň ýolbaşçylaryny bir ýere jemledi.
Ýokary derejeli maslahatyň plenar mejlisinde eden çykyşynyň dowamynda Prezident Gurbanguly Berdimuhamedow Türkmenistanyň ulag ulgamynda ysnyşykly hem-de giň gerimli halkara hyzmatdaşlygyň yzygiderli alnyp barylmagyna berk ygrarlydygyny belläp, ýurdumyzyň bu ugurda anyk teklipleriň birnäçesini öňe sürendigini aýratyn nygtady.
2016-njy ýylyň noýabrynda Aşgabatda geçirilen durnukly ulag ulgamy boýunça birinji Ählumumy maslahatyň logiki dowamy bolmak bilen, nobatdaky forum hem 2030-njy ýyla çenli durnukly ösüş ulgamyndaky Gün tertibiniň hem-de Howanyň üýtgemegi boýunça Pariž ylalaşygynyň durmuşa geçirilmeginde durnukly ulag ulgamynyň derwaýyslygyny öňe çykarýar.