Angliýanyň «Çelsi» klubunyň italiýaly ýarymgoragçysy Jorjinýo Ýewropa futbol assosiasiýalarynyň birleşigi (UEFA) tarapyndan ýylyň iň gowy oýunçysy diýlip yglan edildi. Ýeňiji 26-njy awgustda Çempionlar ligasynyň toparlaýyn tapgyrynyň bije çekişliginde yglan edildi.
Baýraga esasy dalaşgärleriň hatarynda Jorjinýonyň topardaşy, fransiýaly ýarymgoragçy N'golo Kante, şeýle hem «Mançester Sitiniň» belgiýaly ýarymgoragçysy Kewin De Bruýne bardy.
Zenanlaryň arasynda ýylyň iň gowy futbolçysy diýlip ispan «Barselonasynyň» ýarymgoragçysy Aleksiýa Putelýas yglan edildi.
Jorjinýo 29 ýaşynda, geçen möwsümde ol «Çelsiniň» düzüminde Çempionlar ligasynyň ýeňijisi boldy. Finalda londonly klub «Mançester Sitini» (1:0) ýeňdi. Galyberse-de, Italiýanyň düzüminde Jorjinýo Ýewropanyň çempiony boldy. Ýaryşda ol ýedi duşuşyga gatnaşdy we netijeli geçirim ýa-da gol bilen tapawutlanmandy.
Iň gowy derwezeban hökmünde «Çelsiniň» fransiýaly golkiperi Eduard Mendi, iň gowy goragçy — «Mançester Sitiniň» portugaliýaly oýunçysy Ruben Diaş saýlandy. Iň gowy ýarymgoragçy — Kante, iň gowy hüjümçi bolsa Dortmundyň «Borussiýasynyň» norwegiýaly hüjümçisi Erling Holand boldy.
Iň gowy tälimçi baýragy «Çelsiniň» baş tälimçisi nemes Tomas Tuhele gowşuryldy.