Microsoft korporasiýasy Windows 11 adyny alan operasion sistemasynyň täzelenen görnüşini hödürledi. Bu barada TASS habar berýär.
Esasy täzelikleriň biri operasion sistemanyň täzelenen dizaýnydyr. Aýratyn-da, “Pusk” menýusynda düýpli üýtgeşmeler boldy, ol indi ekranyň merkezi böleginde ýerleşer.
Mundan başga-da, täze OS doly işlenilen dizaýna eýe boldy, iki monitoryň işini götermek üçin kämilleşdirilen ulgamy, dürli serwislere elýeterli bolmak üçin wijetleri we başga-da birnäçe täzelikleri aldy. Kompaniýanyň wekiliniň aýtmagyna görä, OS-yň täzelenen görnüşi özünden öňküler bilen deňeşdirilende, has tiz we ygtybarly bolar.
Windows 11-iň işlemegi üçin ýygylygy 1 GGs bolan iki ýadroly 64 bitlik prosessor, 4 gigabaýt operatiw ýat we 64 gigabaýt göwrümli gaty disk gerek bolar. Şeýle-de, 1366x768 piksel durulykda monitor we DirectX 12 tehnologiýasyny göterýän grafiki karta gerek. Monitoryň diagonaly 9 dýuýmdan az bolmaly däl. Bu başlangyç tapgyrda Windows 11-iň telefonlarda we planşetleriň köpüsinde ulanylmajakdygyny aňladýar.
Deňeşdirmek üçin getirsek, Windows 10 32 gigabaýt gaty diski we 2 gigabaýt operatiw ýady talap edýärdi.
Operasion sistemanyň esasy täzelikleriniň biri Windows 11-iň Android üçin programmalary ulanmaga mümkinçilik bermegindedir. Android üçin programmalar Amazon onlaýn dükany arkaly ýaýradylar. Windows 11 operasion sistemasynyň ulanyjylara şu ýylyň ahyrynda elýeterli bolmagyna garaşylýar.
