Dünýädäki milliarderleriň umumy baýlygy 10,2 trln dollara ýetdi. Bu 2017-nji ýyldan bäri täze rekord diýlip, PwC konsalting kompaniýasynyň hasabatynda aýdylýar. Bu barada TASS habar berýär.
“2020-nji ýylyň iýulynyň ahyrynda milliarderleriň umumy baýlygy 10,2 trln dollara ýetdi. Bu dereje 2017-nji ýylyň ahyrynda gazanylan 8,9 trln dollarlyk derejeden (ösüş 19,1%) ýokarydyr. Häzirki wagtda 2017-nji ýyldaky 2158 bilen deňeşdirilende, 2189 milliarder hasaba alynýar” – diýlip, materialda aýdylýar.
2019-njy ýylyň ahyrynda milliarderleriň baýlygy 8 trln dollara, 2018-nji ýylyň ahyrynda 8,5 trln dollara barabardy.
2018-nji ýyldan bäri IT-pudagynda işleýän milliarderleriň umumy baýlygy 42,5% ýokarlanyp, 1,8 trln dollara ýetdi, muňa tehnologiýa kompaniýalaryň paýnamalarynyň düýpli ýokarlanmagy ýardam etdi. Saglygy goraýyş pudagynda milliarderleriň umumy baýlygy 50,3% ýokarlanyp, 658,6 trln dollara ýetdi.
Pandemiýa garşy göreşmek üçin 209 milliarder maliýe kömegine, senagat harytlaryna we enjamlara hem-de beýleki serişdelere $7,2 mlrd sarp etdiler.
2020-nji ýylyň ilkinji aýlarynda pandemiýa dünýä ykdysadyýetiniň ösüşini ep-esli gowşatdy. Fewral we mart aýlarynda birnäçe hepdäniň dowamynda milliarderleriň baýlygy 2019-njy ýyl we 2020-nji ýylyň başy bilen deňeşdirilende, $564 trln ýa-da 6,6% azaldy, 2020-nji ýylyň 7-nji aprelinde $8 trilliona ýetdi. Milliarderleriň sany 43 san, ýagny 2058-e çenli azaldy.