Dünýäniň syýahatçylyk pudagynyň koronawirus pandemiýasy sebäpli 2020-nji ýylda $320 mlrd ýitirmegi mümkin. Bu barada BMG-niň Bütindünýä syýahatçylyk guramasynyň (UNWTO) habarnamasynda aýdylýar. Muny ТАSS ýetirýär.
Beýleki ýurtlara syýahat edýän syýahatçylaryň sany maý aýynda 2019-njy ýylyň degişli döwri bilen deňeşdirilende 98% azaldy. Şu ýylyň ilkinji bäş aýynyň içinde görkeziji 65% pese gaçdy, bu halkara syýahatçylykdan gelýän $320 mlrd girdejiniň ýitmegine getirdi. Bu 2009-njy ýylda ykdysady çökgünlik wagtyndakydan hem üç esse ýokarydyr.
“Soňky maglumatlar syýahatçylygy howpsuz boldugyndan dikeltmegiň möhümdigini görkezýär. Halkara syýahatçylygyň pese gaçmagy millionlarça adamyň ýaşamagyna bolan serişdesiniň ýitmegine howp salýar, bu ösýän ýurtlara-da degişlidir” – diýlip, habarda Bütindünýä syýahatçylyk guramasynyň baş sekretary Zurab Pololikaşwiliniň sözleri getirilýär.
Şeýle-de, häzirki wagtda halkara syýahatçylyk gatnawlarynyň, aýratynam, 1-nji iýulda Ýeriň demirgazyk ýarym şarynda Ýewropa Bileleşiginiň şengen zolagynyň serhetleri açylandan soň, ýuwaş-ýuwaşdan dikelýändigi bellenilip geçilýär. Şol bir wagtda guramada pudagyň diňe 2021-nji ýylyň ikinji ýarymyna çenli gutarnykly dikelmegine garaşylýar.
Bütindünýä guramasynyň hünärmenleri halkara syýahatçylygyň dikelmegine ýaramaz täsir edýän birnäçe sebäplerini belleýärler. Olara gatnawlaryň çäklendirilmegi, köp ýurtlarda serhetleriň ýapylmagy, gezelençlerde kesellemek mümkinçiligi, epidemiýanyň ikinji tolkunynyň bolmak ähtimallygy we serhetleriň täzeden ýapylmagy degişlidir. Koronawirus babatda ygtybarly maglumatlaryň ýokdugy we umumy ykdysady ýagdaýyň ýaramazlaşmagy hem ilaty gezelençlerden saklaýar.
27-nji martda Bütindünýä syýahatçylyk guramasynda halkara syýahatçylyk gatnawlarynyň sanynyň şu ýylyň jemi boýunça koronawirus pandemiýasy sebäpli 2019-njy ýylyň meňzeş görkezijileri bilen deňeşdirilende 20-30% azalyp biljekdigini habar berdiler. Munuň halkara syýahatçylygyň girdejisiniň $300-450 mlrd peselmegine getirip biljekdigi bellenildi.
