Türkmenistanda ýokanç keselleriň ýaýramagynyň öňüni almak maksady bilen birnäçe täze çäklendirmeler girizilýär. Şunuň bilen baglylykda, köp adamly ýerlerde saklanylmaly howpsuz aralyk indi 2 metrden az bolmaly däldir.
ORIENT-iň habar bermegine görä, 2020-nji ýylyň 21-nji iýulyndan 1-nji awgustyna çenli iri söwda merkezleriniň we bazarlaryň işi sanitariýa we zyýansyzlandyryş işleri üçin wagtlaýyn togtadylar. Ýöne azyk önümleri we gündelik islegli önümler bölümleri işini dowam etdirer.
Mundan başga-da, ýokarda agzalan döwürde hyzmatlar ulgamyna degişli edaralar we kärhanalar – kinoteatrlar, teatrlar, seýilgähler, oýun attraksionlary, muzeýler, gözellik salonlary, dellekhanalar, hammamlar, geýim arassalaýjylar (himçistkalar) we tikin atelýeleri ýapylar. Şol sanda, basseýnler, fitnes we aerobika klublary ýaly sport desgalary, gysga möhletli tölegli kurslar we oýun merkezleri wagtlaýyn ýapylar.
Sişenbe gününden aýyň ahyryna çenli jemgyýetçilik naharhanalary – restoranlar, kafeler, barlar, naharhanalar we çaýhanalar işlemez. Şol bir wagtyň özünde, jemgyýetçilik naharhanalary tagamlary ilata sargyt boýunça eltip biler.
Ministrliklere, edaralara, şeýle hem guramalara we kärhanalara, eýeçiligiň görnüşine garamazdan, işçileri kem-kemden zähmet rugsadyna ibermek maslahat berilýär.
Şeýle işler bilen Türkmenistan ýokanç keselleriň öňüni almak boýunça meýilleşdirilen çäreleri dowam etdirýär. Ondan ozal ýurduň serhetýaka etraplara we şäherçelere zyýansyzlandyryjy serişde sepmek üçin kiçi uçarlary ulanýandygy habar berlipdi. Geçen hepde howpsuzlyk agyz-burun örtügini geýmek ýola goýlupdy we ilatyň saglygyny goramak üçin beýleki toplumlaýyn çäreler görlüpdi.