LEGO Group kompaniýasy Wirjiniýa ştatynyň (ABŞ) Çesterfild okrugynda öz hususy Gün elektrostansiýasy bolan önümçilik toplumyny gurýar. Taslama 32 gektar meýdany tutýan Gün energiýa parkyny döretmegi göz öňünde tutýar diýip, Interesting Engineering habar berýär.
Bu ýerde 30 700-den gowrak panel gurlar we olar 22 MWt çenli kuwwatlygy üpjün eder. Mundan başga-da, binalaryň üçeklerinde umumy kuwwaty 6,11 MWt bolan ýene 10 080 panel ýerleşdiriler. Bu bolsa daşarky energiýa çeşmelerinden bölekleýin ýüz döndürmäge mümkinçilik berer.
Umumy bahasy 1,5 milliard dollar bolan bu taslama entek 2022-nji ýylda tanyşdyrylypdy. 138 gektar meýdanda jemi 13 sany bina, şol sanda önümçilik sehleri we awtomatlaşdyrylan ammar gurulýar.
Zawod "uglerod-bitarap" bolar ýaly taslanyldy. Munuň üçin energiýa tygşytlaýjy çözgütler ulanylýar: binalaryň amatly ýerleşdirilmegi, döwrebap izolýasiýa we howany dolandyryş ulgamlary. Şeýle-de, ofis otaglarynda agaç materiallaryny ulanmak we önümçilik galyndylaryny azaltmak göz öňünde tutulýar.
