Maýami-Deýd okrugynyň (Florida ştaty, ABŞ) köçelerine ilkinji awtonom polisiýa awtomobili çykdy. Policing Lab we şerifiň ofisi bilen bilelikde durmuşa geçirilen taslama Police Unmanned Ground Patrol Partner (PUG) adyny aldy. Bu ýurtda sürüjisiz hereket edýän ilkinji patrul SUV ulagy boldy.
Awtomobil üçin esas hökmünde Ford Police Interceptor Utility ulagy alyndy. Ulag Perrone Robotics-den awtonom dolandyryş ulgamy, datçikler toplumy, ýylylyk görüji, töwerekleýin syn ediş kameralary, belgileri tanamak ulgamy we hatda howadan gözegçilik etmek üçin dron bilen üpjün edildi.
Işläp düzüjileriň pikiri boýunça, PUG jenaýatyň ýokary bolan ýerlerinde patrullyk eder, düzgün bozmalary hasaba alar we köçelerde howpsuzlygy ýokarlandyrar. Emeli aň gündelik işleri ýerine ýetirmek bilen, polisiýa işgärlerini çylşyrymly analitiki işler üçin boşadar.
Birinji tapgyrda awtomobil synag režiminde işläp, jemgyýetçilik çärelerine gatnaşar we ýaşaýjylaryň pikirini ýygnar. Hünärmenler geljekde şeýle awtonom ulaglaryň ABŞ-da polisiýa gullugynyň adaty bölegine öwrülip biljekdigini belleýär.
