18-nji awgustdan 25-nji awgust aralygynda Mercedes-AMG GT XX-iň prototipleri 7 gün, 13 sagat, 24 minut, 7 sekuntda Italiýanyň Nardo synag ýolunda 40 075 kilometr geçdi. Bu Ýeriň daşyndan bir aýlaw etmek bilen deňdir. Ýedi günlük sürüşiň dowamynda elektromobil birbada 25 dünýä rekordyny goýdy.
Esasy üstünlik täze AMG.EA elektrik platformasynyň ulanylmagy boldy. Üç YASA elektrik hereketlendirijisi we göni sowadyş bilen ýokary öndürijilikli batareýa ulaga 24 sagatda 5479 kilometr geçmäge mümkinçilik berdi – bu XPeng P7 hytaý elektromobiline degişli bolan öňki rekorddan 1518 kilometr köpdür.
Prototipleriň ikisi-de yzygiderli 300 km/sag tizligi saklap, diňe zarýad bermek üçin durdy. Zarýad bermegiň kuwwaty 850 kWt boldy, bu bolsa adaty infrastrukturadan onlarça esse ýokarydyr. Bäş minutda akkumulýator WLTP boýunça 400 km menzil üçin ýeterlik zarýady aldy.
Awtomobiller synaga bir wagtda başlap, biri-birinden 25 km-den az tapawut bilen pellehana geldi. Olar 12,68 kilometrlik ýol boýunça 3177 aýlaw we 35 gradusa çenli temperatura şertlerinde 5300 kilometrden gowrak ýol geçdi.
Mercedes-Benz Group AG-yň baş tehniki müdiri Markus Şefer synaglaryň täze AMG elektrik platformalarynyň mümkinçiliklerini tassyklandygyny we bu tehnologiýalaryň 2026-njy ýylda yzygiderli ulanylmagyna ýol açandygyny belledi. Hususan-da, ol YASA elektrik hereketlendirijileriniň we sowadyş ulgamynyň netijeliligini belläp geçdi. Olar brendiň geljekki elektrik modelleri üçin esas bolup biler.
