Milanyň “Interi” Çempionlar ligasynyň ýarym finalynyň jogap oýnunda “Barselonany” utup, ýaryşyň finalyna çykdy. Duşuşyk italýan toparynyň “San-Siro” stadionynda geçirildi.
Esasy wagtda oýun 3:3 hasabynda tamamlandy. Birinji ýarymda ýer eýeleriniň düzüminden Lautaro Martines (21-nji minut) we Hakan Çalhanoglu (45+1) gol bilen tapawutlandy.
Arakesmeden soň katalon kluby Erik Garsiýanyň (55) we Dani Olmonyň (60) gollary bilen kambek etdi. 8-nji minutda “Barselonanyň” hüjümçisi Rafinýa topary öňe çykardy. Ýöne 93-nji minutda Milan klubunyň merkezi goragçysy Françesko Açerbi oýny goşmaça wagta geçirdi.
Goşmaça wagtda 98-nji minutda “Inter” Dawide Fratteziniň goly bilen öňe çykdy. 114-nji minutda klubuň derwezebany Ýan Sommer Lamin Ýamalyň howply urgusyny yzyna gaýtardy. Şweýsariýaly derwezeban iň jogapkärli pursatlarda toparyny halas etdi we duşuşygyň netijesi boýunça oýnuň iň gowy oýunçysy diýlip ykrar edildi.
Duşuşyk “Interiň” peýdasyna 4:3 hasabynda tamamlandy (iki oýnuň jemi boýunça 7:6).
“Barselona” – “Inter” duşuşygy iki oýunda umumylykda biri-birine 13 gol geçirip, Çempionlar ligasynyň ýarym finallarynda netijelilik boýunça rekordy gaýtalady. 2018-nji ýylda “Liwerpul” – “Roma” oýny hem umumy 7:6 hasabynda tamamlanypdy.
Şol bir wagtyň özünde, “Barselona” bir ýaryşda sypdyran gollary boýunça öz antirekordyny goýdy. Häzirki möwsümde klub 24 gol sypdyrdy. 1999/2000 möwsüminde topar bir ýaryşda 23 gol sypdyrypdy.
Çempionlar ligasynyň ikinji ýarym finalçysy 8-nji maýa geçilýän gije “PSŽ” bilen “Arsenalyň” arasynda kesgitlener. Birinji ýarym finalda Pariž kluby londonlylary 1:0 hasabynda utupdy.
Çempionlar ligasynyň finaly 31-nji maýda Mýunhendäki “Alýans Arena” stadionynda geçiriler.
