Ilon Maskyň ýolbaşçylyk edýän xAI we X kompaniýalary Atlantada kuwwatly maglumat merkezini gurmak üçin 700 mln dollar maýa goýýar. Bu Develop Fulton ykdysady ösüş agentliginiň resminamalaryndan gelip çykýar diýip, IXBT habar berýär.
Maglumat merkezinde 12 448 sany Nvidia grafiki prosessory, esasan, Hopper H100 çipleri oturdylar. Bu GPU-laryň bahasy sekiz prosessordan ybarat sütün üçin 277 müň dollardan 500 müň dollara ýetýär. Şeýle-de, kuwwaty sähel pes bolan A100 modellerinden 3% ulanylar. Olaryň bahasy her sütün üçin 147 müň dollara barabar.
X 442 mln dollar, xAI 258 mln dollar maýa goýar. Munuň üçin olar 10 ýyl üçin 10 mln dollar salgyt ýeňilliklerini alar. Taslamanyň ykdysady netijeliligi 241 mln dollar diýlip hasaplanýar. Maglumat merkezi 20 megawatt energiýa sarp edýär.
Merkez EA modellerini we X önümlerini okatmak üçin ulanylar. Häzir sebitde X-den 16 işgär we xAI-den üç adam işleýär, merkezde 24 iş orny göz öňünde tutulýar. Bu Maskyň OpenAI we Google bilen bäsdeşlikde täze ädimidir.
Ýakynda xAI täzelenen Grok çat-botuny döretdi we ol, Maskyň aýtmagyna görä, öňki wersiýalardan 10 esse kuwwatly.
