TÜRKSOÝ guramasy "Akyldar hem şahyr Magtymguly Pyragy" temasy boýunça düzme bäsleşiginiň netijelerini yglan etdi. Bäsleşik Azerbaýjanyň, Gazagystanyň, Gyrgyzystanyň, Türkmenistanyň, Türkiýäniň we Özbegistanyň mekdep okuwçylarynyň arasynda geçirildi.
Bäsleşige gatnaşyjylar işlerinde Magtymgulynyň döredijiliginiň ähmiýeti we türki dilli halklar üçin mirasynyň möhümligi barada beýan etdiler.
Bäsleşigiň netijeleri boýunça her ýurtdan üç sany ýeňiji saýlandy. Türkmenistandan Gülendam Rahymowa, Mährijemal Begjanowa we Tumar Aşyrowa ýeňiji boldy.
Ýeňijilere diplomlar we sowgatlar gowşurylar, baş baýrak bolsa Türkmenistana guraljak sapar bolar. Baýrak gowşurmak dabarasy "Änew - türki dünýäsiniň medeni paýtagty 2024" ýylynyň jemlemesiniň çäklerinde oktýabr aýynyň ahyrynda geçiriler.
Bäsleşigiň guramaçylary bolup, TÜRKSOÝ we Türki döwletleriň Bilim ministrlikleri çykyş edýärler. Bäsleşik 2024-nji ýylyň 15-nji martynda yglan edilip, türkmen şahyrynyň 300 ýyllygyna bagyşlandy diýip, "Türkmenistan: Altyn asyr" elektron neşiri habar berýär.
