Hytaý ikinji aşa çuň gözleg guýusyny burawlap başlady. Bloomberg-iň Hytaýyň Sinhua agentligine salgylanyp berýän habaryna, guýynyň taslamadaky çuňlugy 10,520 metrdir.
Guýy Syçuan çöketliginiň demirgazyk-günbatarynda ýerleşýär. Bu ýer Hytaýyň esasy gaz öndürýän sebiti hasaplanýar. Täze taslamanyň maksady –aşa çuňlukdaky tebigy gaz ýatagyna ýetmek. Hünärmenler şeýle hem çöketligiň döremeginiň taryhyna düşünmäge we respublikanyň nebit-gaz pudagy üçin täze tehnologiýalaryň ösüşini çaltlaşdyrmaga umyt baglaýarlar. Guýy Hytaýyň PetroChina kompaniýasy tarapyndan burawlanýar.
Bu Hytaýda eýýäm şuňa meňzeş ikinji taslamadyr. Maý aýynyň ahyrynda ýurduň demirgazyk-günbataryndaky Sinszýan sebitindäki Tarim çöketliginiň çölünde dünýäniň iň çuň şahtasyna öwrülip biljek ýerde buraw işleri başlandy. Bu taslamanyň maksatlary synag häsiýetine eýedir. Hytaýly alymlar Ýeriň içki gurluşyny we ewolýusiýasyny öwrenmek we geologiki hem-de geofiziki gözlegler üçin maglumatlary ýygnamak isleýärler. HHR täze gazylyp alynýan peýdaly magdanlary üstünlikli gözlemäge-de bil baglaýar.
