Duşenbe şäherinde geçirilen bije çekişlik dabarasynda futbol boýunça Türkmenistanyň milli ýygyndysynyň CAFA NATIONS CUP-2023 ýaryşyndaky garşydaşlary mälim boldy. Bu babatda Türkmenistanyň Futbol federasiýasynyň saýtynda habar berilýär.
CAFA NATIONS CUP-2023 ýaryşy 11-20-nji iýun aralygynda geçiriler.
Bije çekişlik dabarasy onlaýn görnüşinde geçirildi.
Bije çekişligiň netijesinde Türkmenistanyň milli ýygyndysy «A» toparçada Özbegistanyň, Täjigistanyň hem-de Omanyň milli ýygyndylary bilen güýç synanyşmaga mümkinçilik aldy. «A» toparçadaky oýunlar Özbegistanyň Daşkent şäherinde geçiriler. «B» toparçadan Eýranyň, Gyrgyzystanyň hem-de Owganystanyň milli ýygyndylary orun aldylar. «B» toparçanyň duşuşyklary Gyrgyzystanyň Bişkek şäherinde bolup geçer.
Ýaryşyň geçiş tertibine laýyklykda, toparçalaýyn tapgyrdaky oýunlar aýlaw görnüşinde geçirilip, bir aýlawdan ybarat bolar. Soňra toparçalaryň ýeňijileri finalda, toparçada ikinji orny eýelänler bolsa üçünji orun ugrunda geçiriljek duşuşyga gatnaşarlar. Final hem-de üçünji orun üçin oýunlar Özbegistanyň Daşkent şäherinde geçiriler.
