Netflix “Jadygöý” (Ведьмак) serialynyň dördünji möwsüminiň resmi tizerini hödürledi we premýeranyň 2025-nji ýylyň 30-njy oktýabrynda boljakdygyny mälim etdi. Indi baş gahryman Geraldyň keşbini Genri Kawilliň deregine Liam Hemswort ýerine ýetirer.
Deadline neşiriniň habar bermegine görä, täze möwsümde Geralt, Ýennifer we Siti uruş bilen gurşalan Yklymda aýlanyp, täzeden birleşmek üçin duşmanlar bilen biri-birinden üzňelikde söweşmeli bolar. “Gahrymanlaryň ýollary aýrylyşandan soň, olar garaşylmadyk tarapdarlara duşýar. Eger olar bu tapynan maşgalalaryny kabul edip bilse, olaryň baky birleşmäge mümkinçiligi bolar…” diýlip, serialyň gysgaça beýanynda aýdylýar.
Mundan başga-da, serialdan kadrlar hödürlendi we olarda daşky keşbi boýunça diňe Geraldyň däl, eýsem Freýýa Allanyň ýerine ýetirmeginde Siriniň hem üýtgändigini görmek bolýar.
Posterde üç baş gahryman görkezilýär: Geralt, Siri we Ýennifer. Serialyň marketing kampaniýasy premýera çenli dowam eder, şonuň üçin ýakynda täze kadrlar hem peýda bolar.
Ýeri gelende bellesek, Genri Kawilliň serialdan gitmeginiň sebäbi onuň fiziki we emosional taýdan ýadamagy boldy – ol serialda ähli pirimleri özbaşdak ýerine ýetirip, günde 12 sagatlap kamera düşdi. Režissýor Mark Ýobst aktýoryň öz öňünde ýokary maksatlary goýandygyny we gylyçly söweş sahnasynda dublýorsyz işländigini, munuň hem ýokary fiziki we emosional güýji talap edendigini belledi.
Aktýorlar düzüminde başga üýtgeşmeler hem bar: indi Wesemiriň keşbini Kim Bodnianyň deregine Piter Mallan ýerine ýetirer. Bu öňki aktýoryň işiniň köplügi bilen baglanyşykly boldy.
Mundan başga-da, aktýorlar düzümine Regisiň keşbinde Lorens Fişbern, şeýle-de Anýa Çalotra, Freýýa Allan, Joi Beti, Eýmon Ferren, Anna Şaffer we beýlekiler goşuldy.
Esasy möwsümleri, spin-offlary we animasion taslamalary hasaba alanyňda, “Jadygöýiň” önümçiligi Netflix-e, takmynan, 800-850 mln dollara düşdi.
