Türkmenistanda 26-njy martda geçiriljek saýlawlara taýýarlyk görmegiň we olary geçirmegiň barşyna baha bermek üçin Ýewropada Howpsuzlyk we Hyzmatdaşlyk Guramasynyň Demokratik institutlar hem-de adam hukuklary boýunça býurosynyň toparynyň agzalary Aşgabada geldi.
Türkmenistanda Saýlawlary we sala salşyklary geçirmek boýunça merkezi toparyň edara binasynda ÝHHG-niň synçylar toparynyň agzalary bilen duşuşyk geçirildi. Onuň barşynda ÝHHG-niň toparynyň agzalaryna degişli şahadatnamalar gowşuryldy.
Myhmanlar merkezi saýlaw topary tarapyndan bellenilen meýilnama, saýlaw okruglarynyň we uçastoklarynyň sanawy, resminamalaryň nusgalary hem-de ýerlerde geçirilen işler bilen tanyşdyryldy.
Öz ygtyýarlyklarynyň çäklerinde synçylara saýlawlaryň öň ýanyndaky çäreleriň barşyny bökdençsiz synlamaga hem-de gönüden-göni ses berilýän güni paýtagtymyzda we welaýatlarda saýlaw uçastoklaryna baryp görmäge mümkinçilik dörediler.
Toparyň agzalarynyň ýurdumyzda bolmagynyň maksatnamasynda birnäçe ministrliklerde hem-de pudaklaýyn dolandyryş edaralarynda duşuşyklar meýilleşdirildi.
Ýakynda GDA-dan synçylar topary Türkmenistanda Mejlisiň ýedinji çagyrylyşynyň deputatlarynyň saýlawlarynyň taýýarlyk işlerine hem-de geçirilişine gözegçilik etmäge girişdiler.
