Özbegistan Hytaý-Gazagystan-Türkmenistan-Eýran demir ýoluna goşuldy, diýip Trend agentligi Gazagystanyň magistral demir ýol ulgamynyň iri operatory bolan "Казахстан Темир Жолы"-nyň metbugat gullugyna salgylanyp habar berýär.
Ýakynda Almatyda (Gazagystan) Türkmenistanyň, Gazagystanyň, Hytaýyň, Eýranyň we Özbegistanyň demir ýol edaralarynyň wekilleriniň duşuşygy geçirildi. Onda umumy halkara demir ýol geçelgesi boýunça ýük gatnawlaryny has hem artdyrmak meseleleri ara alnyp maslahatlaşyldy.
2018-nji ýylda Hytaý-Gazagystan-Türkmenistan-Eýran demir ýoly boýunça gatnawlaryň möçberi 1 müň TEU (20 futlyk ekwiwalentde konteýner) deň boldy, diýip metbugat gullugy habar berýär.
Gepleşikleriň barşynda ýük gatnawlarynyň artdyrylmagy üçin olaryň öz wagtynda iberilmeginiň möhümdigi bellenildi. Şunuň bilen baglylykda, taraplar ýük ugradyjylary göçme düzümler bilen bilelikde üpjün etmeklige borçlandylar.
Duşuşygyň barşynda Eýran – Hytaý ugry boýunça goşmaça ýükleri çekmek, yzygiderli konteýner hyzmatlaryny gurnamak we bu geçelge boýunça şu ýyl ýüklenen konteýnerler üçin tarif şertlerini kesgitlemek meseleleri maslahatlaşyldy.
Ylalaşyklar Jemleýji beýanda berkidildi.
Bu ulag-üstaşyr geçelgäniň döredilmegi Gazagystan-Türkmenistan-Eýran halkara demir ýolunyň gurulmagy bilen mümkin boldy. Bu ýol 2014-nji ýylyň dekabrynda Gazagystanyň, Türkmenistanyň we Eýranyň döwlet Baştutanlarynyň gatnaşmagynda açyldy.
