Eýranda suw joşmalary netijesinde soňky hepdäniň dowamynda azyndan 61 adam aradan çykdy. Bu barada şenbe güni Eýranyň Gyzyl Ýarymaý Jemgyýetiniň adatdan daşary ýagdaýlar bölüminiň ýolbaşçysy Mehdi Walipur habar berdi.
"Ýurtda mordad aýynyň başyndan bäri (eýran senenamasy boýunça 23-nji iýulda başlandy) bolup geçen suw joşmasy netijesinde aradan çykanlaryň sany 61-e ýetdi" diýip onuň sözlerini ISNA agentligi getirýär. Şeýle hem ol häzirki wagtda 32 adamyň dereksiz ýiten hasaplanýandygyny habar berdi.
Eýranyň 31 welaýatynyň 18-sini tebigy betbagtçylyk gurşap aldy. Bahtiariýa, Isfahan, Ýezd, Lurestan, Mazanderan, Tähran we Çeharmehal tebigy betbagtçylykdan has ejir çekdi.