Merilend Uniwersitetiniň (ABŞ) lukmançylyk merkeziniň hirurglary doňzuň genetiki taýdan modifisirlenen ýüregini adama oturtmak boýunça dünýäde ilkinji tejribe operasiýasyny amala aşyrdylar. Lukmanlaryň aýtmagyna görä, näsag Dewid Bennete ýürek oturdylmadyk bolsady, onuň ýaşamak mümkinçiligi bolmazdy diýip, BBC habar berýär.
Operasiýa ýedi sagat dowam etdi. Üç günden soň, Bennetiň janyna howp salýan zat ýok.
"Mende ölüm bilen şu ýüregi oturtmak saýlawy bardy. Mundan aňyrky ykbalymyň näbellidigine düşünýärin, emma bu meniň üçin soňky mümkinçilik» — diýip, 57 ýaşly Bennet operasiýadan öň aýtdy.
Hünärmenler operasiýa edilmese, näsagyň aradan çykjakdygyny düşündirip, häkimiýetlerden rugsat aldylar. Ýürek oturtmagyň üstünlikli bolandygy barada netije çykarardan heniz ir.
Lukmanlar Dewid Bennete adam ýüregini oturtmagy mümkin däl hasapladylar — adatda, bu hili karar näsag aşa agyr ýagdaýda ýatan bolsa kabul edilýär.
Hirurglar üçin operasiýa köp ýyllyk barlaglaryň netijesi boldy. Belläp geçmeli zatlaryň biri, kardiohirurgiýada adama doňuz ýüreginiň käbir bölekleriniň, hususan-da, klapanlarynyň oturdylmagy giňden ýaýrandyr.
Frans Press agentliginiň maglumat habar bermegine görä, oturdylan ýürek genetiki taýdan modifisirlendi: alymlar oturdylan organyň bölünip aýrylmagyna getirip biljek geni ýok etmeli boldular.
Hünärmenler bu üstünlikleriniň «donorlyk organlarynyň ýetmezçiligi bilen bagly meseleleri çözmäge ýakynlaşdyryp» tutuş dünýäde köp sanly adamlary halas etmäge ýardam edip bilmegine umyt baglaýarlar.
OrganDonor.gov saýtynyň maglumatlaryna görä, diňe ABŞ-nyň özünde donorlyk organlarynyň oturdylmagyna 100 müň töweregi adam garaşýar, donorlyk organlarynyň ýetmezçiligi zerarly ýurtda her günde 17 näsag aradan çykýar.
