Dünýäde düzüminde gurşun birleşmesini saklaýan etilirlenen benziniň ulanylmagy doly derejede bes edildi. Bu barada BMG-niň Daşky gurşaw boýunça maksatnamasynyň ýerine ýetiriji müdiri habar berdi. Dünýäde geçen aýa çenli şeýle ýangyjyň ätiýaçlyklary saklanan we ulanylmagy dowam etdirilen iň soňky ýurt Alžirdi diýip, euronews.com belleýär.
Etilirlenen benzin oktan sanyny ýokarlandyrmak üçin antidetonasion goşundysy – tetraetil gurşuny (TEG) goşulýan benzin bolýar. TEG-iň köpçülikleýin önümçiligi geçen açyryň 20-nji ýyllarynda ABŞ-da başlandy. Hünärmenler etilirlenen benzinde işleýän awtomobiliň atmosfera 100 km ýol üçin 3-4 gram gurşun zyňýandygyny anykladylar. Olar ýangyjyň bu görnüşiniň adam organizmi we tebigat üçin howpludygyny duýdurdylar. Muňa garamazdan, 1970-nji ýyllara çenli dünýäde satylýan benziniň ählisinde diýen ýaly TEG bardy. Bu ýagdaý geçen asyryň ahyrlaryna çenli, ýagny köp ýurtlaryň häkimiýetleri benziniň bu görnüşini ulanmagy gadagan edip başlanlarynda düýpgöter üýtgedi.
Ştab-kwartirasy Keniýanyň paýtagty Naýrobide ýerleşýän ÝUNEP-iň hasaplamasy boýunça, dünýäde benziniň bu görnüşiniň ulanylmagynyň doly derejede bes edilmegi ýylda 1,2 milliondan gowrak wagtyndan irki ölümleriň öňüni aldy.
