2022-nji ýylda “Oskar” baýragynyň 94-nji gowşurylyş dabarasynyň senesi 27-nji fewraldan 27-nji marta geçiriler. Bu barada maglumat Amerikanyň kino sungaty akademiýasynyň resmi saýtynda ýerleşdirildi diýip, TASS habar berýär.
Şeýle-de, filmleri saýlamagyň ahyrky möhletiniň 31-nji dekabra çenli dowam etjekdigi we filmleriň 2021-nji ýylyň 1-nji martyndan 2021-nji ýylyň 31-nji dekabry aralygynda çykan bolmalydygy habar berilýär.
“Oskar” baýragynyň 94-nji gowşurylyş dabarasynda dalaşgärlere bildirilýän talaplar 93-nji baýrak gowşurylyş dabarasynyň möwsüminde girizilen goşmaçalara gabat geler. Şu ýylyň ahyrynda akademiýa 95-nji baýrak üçin kwalifikasiýa talaplaryny giňeltmegi meýilleşdirýär” – diýlip, tekstde aýdylýar.
Birnäçe nominasiýalarda baýragyň gysga sanawyna giren filmler 21-nji dekabrda belli bolar, ähli kategoriýalarda baýraga dalaşgärler 8-nji fewralda yglan ediler.
Koronawirus pandemiýasy bilen baglanyşykly girizilen çäklendirmeler sebäpli, 2021-nji ýylda guramaçylar 93-nji dabaranyň gerimini kiçeltmeli boldular. Onuň esasy bölegi Los-Anjelesiň Union Station demir ýol menziliniň amfiteatrynda geçirildi. Iň gowy film “Çarwalaryň ýurdy”, iň gowy režissýor – Hloýa Çžao, iň gowy aktrisa – Frensis Makdormand, iň gowy aktýor – Entoni Hopkins boldy. Dabaranyň ýaýlymyna 9,85 mln adam tomaşa etdi, bu baýrak gowşurylyş dabarasynyň taryhynda iň pes görkezijidir.