Auto.ru portalynda 1948-nji ýylda öndürilen seýrek ZIS-110 limuzininiň satylýandygy hakynda mahabat peýda boldy. Sowet döwrüniň awtoulagy 57 million rubl diýlip bahalandyrylýar.
Ulanyş möhletine garamazdan, limuzin bary-ýogy 10 müň kilometr ýol geçipdir. Awtoulag - gowy ýagdaýda. Onuň eýesi ZIS-110-yň juda seýrekdigini we onuň ýekeje eýesiniň bolandygyny aýtdy. Häzirki wagtda awtoulag Moskwada ýerleşýär.
Awtoulagyň kapotynyň aşagynda kuwwaty 140 at güýji bolan 8 silindrli 6.0 litrlik benzin hereketlendirijisi bar. Bular bilen bilelikde, awtoulagda 3 tizlikli mehaniki transmissiýa hem bar.
Bu model uruşdan öňki döwürde işlenip düzüldi we 1945-nji ýylda söweş gutarandan soň derrew satylyp başlandy. Modeliň önümçiligi 1958-nji ýylda togtadyldy we şol wagta çenli ZIS-110-yň ähli wersiýalarynyň 2 müň 89 nusgasy çykaryldy.
