Koronawirus pandemiýasy we gurakçylyk sebäpli hindi çaýynyň bahasy gymmatlap biler

Koronawirus pandemiýasy we gurakçylyk sebäpli hindi çaýynyň bahasy gymmatlap biler

Hindistanda koronawirusyň täze tolkuny çaý plantasiýalaryna hem ýetdi. Ýurduň iň uly çaý öndürijisi bolan Assam ştatyndaky 90 çaý plantasiýasynda 500-den gowrak koronawirus ýagdaýy ýüze çykaryldy. Şeýle-de bolsa, plantasiýa eýeleri ähli işgärleriň goşmaça barlaglarynyň epidemiýanyň hakyky derejesini görkezip biljekdigini aýdýarlar. Bu barada «Financial Times» neşirine ýerli çaý assosiasiýasynda habar berildi. Muny 360tv.ru ýetirýär.

Koronawirus bilen bagly ýaramaz ýagdaý beýleki 800 plantasiýada hem hasaba alynýar. Öndürijiler eger ýagdaýy gözegçilik astyna almak başartmasa, epidemiýanyň hasylyň ýygnalmagyna päsgel berip, çaýyň bahasynyň gymmatlamagyna getirip biljekdigini duýdurýarlar.
Önümçilikde ýokanjyň ýaýramagyna köp işgärleriň ýaşaýan we zähmet çekýän şertleri hem täsir edýär. Bellenilişi ýaly, çaý önümçiliginiň işgärleri, adatça, uly topar bolup işleýärler we hereket edýärler, olaryň ýaşaýan ýerleri bolsa, köplenç, adamdan dolýar.
Koronawirus bilen bagly ýagdaý çaý ýapraklarynyň agaçlarda guramagyna getirýän Assamdaky we Hindistanyň demirgazyk-gündogaryndaky güýçli gurakçylyk sebäpli hem ýaramazlaşýar. Şu ýylyň mart aýynda Demirgazyk Hindistanda çaý önümçiligi, Van Rees kompaniýasynyň maglumatlaryna görä, bary-ýogy 47 mln kg ýetdi. Pandemiýadan öň, ýagny 2019-njy ýylda ol 60 mln kg bolupdy.