Türkmenistanyň Prezidentiniň «Saglyk» Döwlet maksatnamasynyň rejelenen görnüşi we ony amala aşyrmak boýunça ýerine ýetirilmeli çäreleriň 2021-2025-nji ýyllar üçin meýilnamasy tassyklanyldy.
Degişli ministrlikler we pudaklaýyn dolandyryş edaralary «Saglyk» Döwlet maksatnamasynyň rejelenen görnüşini hem-de ony amala aşyrmak boýunça ýerine ýetirilmeli çäreleriň bellenilen möhlet üçin meýilnamasyny işläp taýýarladylar.
Bu resminama ilatyň saglyk ýagdaýyny has-da gowulandyrmaga we abadançylygyny ýokarlandyrmaga, adam ömrüniň dowamlylygyny artdyrmaga, raýatlar üçin saglygy goramak babatda hemmetaraplaýyn deň mümkinçilikleri we şertleri üpjün etmäge, saglygy goraýşy halkara ölçeglere laýyklykda ösdürmäge hem-de innowasion tehnologiýalara, öňdebaryjy lukmançylyk ylmyna we tejribesine esaslanýan kämil we ýokary netijeli saglygy goraýyş ulgamyny döretmäge ýardam eder.
