Apple kompaniýasy eplenýän ekranly smartfony taýýarlamaga başlady. Bu barada Bloomberg agentligi çeşmä salgylanmak bilen habar berýär. Muny RBK mediaholdingi ýetirýär.
Onuň maglumatlaryna görä, iş prosesi displeýi döretmek tapgyrynda bolup, häzirlikçe kompaniýada eplenýän iPhone-yň nusgasy ýok.
Kompaniýa eplenýän ekranyň ölçegi barada belli bir netijä gelmedi. Esasan, iPhone 12 Pro Max ýaly diagonaly 6,7 dýuým (takmynan, 17 sm) displeý görnüşi göz öňünde tutulýar.
Apple-iň synagdan geçirýän ekranlarynyň köpüsinde eplenilende görünmeýän halka (şarnir) mehanizmi bar, ýagny telefon doly açylan ýagdaýynda ekran bir bitewä öwrülýär. Samsung-yň eplenýän smartfonlary hem şeýle görnüşde gurnalan. Ýöne Microsoft kompaniýasynyňky tapawutlanýar, onda görnüp duran halkalar iki aýratyn paneli birikdirýärler.
Agentligiň belleýşi ýaly, eplenýän iPhone ýakyn wagtda çykarylmaz, onuň asla çykmazlygy hem ähtimal. Häzir Apple esasy ünsüni şu ýylyň ahyrynda täze iPhone we iPad flagman gurluşlaryny çykarmaga gönükdirýär.
Kompaniýanyň eplenýän iPhone-yň nusgasyny taýýarlaýandygy barada dekabr aýynyň ahyrynda “Forbes” hem habar beripdi. Çeşmäniň maglumatlaryna görä, gurluş daşky görnüşi boýunça Samsung-yň Galaxy Z Flip-ine meňzär.