Tomas Tuhel “Pari Sen-Žermeniň” baş tälimçisi wezipesinden boşadyldy diýip, “L’Equipe” neşirine salgylanmak bilen gazeta.ru habar berýär.
Çeşmäniň berýän maglumatlaryna görä, “Pari Sen-Žermen” Tuheli şertnamanyň möhletiniň tamamlanmagyndan ýarym ýyl öň işden çykarmak kararyna geldi.
Pariž klubynyň ýolbaşçylygy Fransuz Liga 1-niň “Strasburg” (4-0) bilen 17-nji tapgyr duşuşygynda ýeňiş gazanylandan soň tälimçiniň işden aýrylandygyny mälim etdi.
Indi fransuz toparyna Maurisio Poçettino ýolbaşçylyk eder diýip, çeşme habar berýär. Häzirki wagtda 48 ýaşly Poçettino hiç ýerde işlemeýär. Ol 2019-njy ýylyň noýabr aýynda Çempionlar ligasynyň finalyna çykan “Tottenhemden” gitdi.
Ýatlap geçsek, Tomas Tuhel “Pari Sen-Žermene” 2018-nji ýylda ýolbaşçylyk edip başlady. “PSŽ” Fransiýanyň çempionatynda “Liondan” bir utuk yza galyp, 35 utuk bilen üçünji orny eýeleýär. Pariž topary Çempionlar ligasynyň 1/8 finalyna çykdy we ol ispan “Barselonasy” bilen duşuşar.
