Amerikanyň Pfizer we Germaniýanyň BioNTech kompaniýalary tarapyndan işlenip taýýarlanan koronawirusa garşy sanjym synag wagtynda 90%-den gowrak netijelilik görkezdi diýip, INTERFAX.RU habar berýär.
"Koronawirusa garşy göreşip biljek sanjym COVID-19 bilen kesellemegiň öňüni almakda 90% -den gowrak netijelilik görkezdi" -diýlip, Pfizeriň web sahypasynda çap edilen beýanatda aýdylýar. "Bu gün ylym we adamzat üçin ajaýyp gün. COVID-19-a garşy sanjymyň üçünji tapgyrynyň kliniki synaglarynyň netijeleriniň birinji bölegi dermanyň koronawirus ýokançlygynyň öňüni alyp biljekdigini subut edýär" -diýip, kompaniýanyň ýerine ýetiriji direktory Albert Burla aýtdy.
ABŞ-nyň prezidenti Donald Tramp bu netijelere eýýäm öz garaýşyny bildirdi hem-de olary "ajaýyp täzelik" diýip atlandyrdy.
"Sanjymyň 90% netijeliligi aýdylýar. Gör, nähili gowy täzelik" -diýip, Tramp öz Twitter hasabynda ýazdy.
Synaglaryň üçünji tapgyry 27-nji iýulda başlandy we oňa 43 müň adam gatnaşdy, olaryň 40 müňe golaýy potensial sanjymyň ikinji dozasyny aldy.
Şeýlelik bilen, amerikan metbugatynyň habaryna görä, sanjym haýal etmän tassyklansa, onuň ilkinji dozalary şu ýylyň ahyryna çenli saglygy goraýyş işgärlerine elýeterli bolar. Kompaniýalaryň sanjymyň howpsuzlygy barada noýabr aýynyň ortalaryna çenli maglumat ýygnajakdygy bellenilýär. Soňra ýygnalan ähli maglumatlar ABŞ-nyň Azyk önümlerine we derman serişdelerine gözegçilik müdirligine geçiriler.
Pfizer gözlegleri ABŞ-nyň hökümeti tarapyndan maliýeleşdirilýän Moderna bilen bilelikde sanjymyň kliniki synaglarynyň soňky, üçünji tapgyryny geçirýär. ABŞ-nyň häkimiýetleri eýýäm bu sanjymyň köp mukdaryny ätiýaç üçin aýryp goýdular we dermanlar ulanmak üçin tassyklanan badyna olary tutuş ýurt boýunça ýaýratmaga taýyn.
