Dünýäniň iň baý on adamynyň baýlygy 26-njy oktýabra görä, $14,4 mlrd azaldy. Muny Bloomberg agentligi tarapyndan alnyp barylýan Bloomberg Billionaires Index-iň (BBI) maglumatlary delillendirýär diýip, gazeta.ru habar berýär.
26-njy oktýabrdaky bazaryň jemi boýunça, BBI reýtinginiň onlugyndan diňe iki milliardere baýlygyny artdyrmak başartdy, ýagny Tesla we SpaceX kompaniýalaryny esaslandyryjy Ilon Mask baýlygyny $2,88 mlrd artdyryp, reýtingiň dördünji ornunda ýerleşdi, Amazon kompaniýasyny esaslandyryjy Jeff Bezos bolsa $263 mln gazandy, ol reýtingiň lideri bolmagynda galýar.
Forbes Real-Time-iň maglumatlary boýunça, on milliarderiň umumy baýlygy bir günde $17 milliarddan gowrak azaldy, diňe Jeff Bezos baýlygy azalmadyk ilkinji onlukdan ýeke-täk telekeçi boldy. “Forbes” neşiriniň maglumatlary boýunça, Ilon Mask $66 mln ýitirdi.
Reýtingiň onlugyna, esasan, amerikalylar girýär, diňe iki orny Hindistanyň we Fransiýanyň wekilleri eýeleýär. Olar Reliance Industries kompaniýasynyň eýesi Mukeş Ambani we Louis Vuitton Moet Hennessy kompaniýalar toparynyň prezidenti Bernar Arnodyr.
Dünýäniň iň baý on adamynyň baýlygynyň pese düşmeginiň esasy sebäbi amerikan fond bazarlarynyň duşenbe günündäki söwdasy bilen baglanyşyklydyr. Dow Jonesyň indeksi 2,3% pese gaçdy, bu üstümizdäki ýylyň 3-nji sentýabryndan bäri bir söwda tapgyrynda iň güýçli pese gaçyş boldy. S&P 500 amerikan indeksi hem 1,9%-ni ýitirip, bir aýyň içinde iň uly pese gaçyşy görkezdi. Nasdaq-yň indeksi 1,6% peseldi.
