“France Football” fransuz neşiri özüniň okyjylaryna “Madridiň “Realynyň” kapitany Serhio Ramosy taryhda iň gowy goragçy hasap edýärsiňizmi?” diýen sorag bilen ýüzlendi. Bu barada gazeta.ru habar berýär.
Ses berenleriň 67%-i bu soraga tassyklaýjy jogap berdiler. Ramosyň özi hem bu pikir soraşmadan çetde durmady.
“France Football-yň şeýle sorag bermegi meni buýsandyrýar” – diýip, futbolçy özüniň Twitterinde ýazdy.
Ramos goragçylaryň arasynda Premýeranyň tutuş taryhynyň iň gowy bombardiri hasaplanylýar, onuň hasabynda 100 gol bar. Ramos “Sewilýanyň” ýetişdiren oýunçysy. 2005-nji ýylda ol Madridiň “Realyna” geçdi we häzir hem şonda çykyş edýär. 34 ýaşly futbolçy “Real” bilen bilelikde 22 titula eýe boldy. Mundan başga-da, Ramos dünýä çempiony we Ispaniýanyň milli ýygyndy toparynyň düzüminde iki gezek Ýewropa çempiony boldy.
Ýeri gelende bellesek, “France Football” Ramosy futbolyň tutuş taryhyndaky simwoliki topara girmek üçin dalaşgärleriň sanawyna goşdy. Ýakynda Ramos El-Klassikoda özüniň hasabyna bir gol ýazdy, şol gezek “Real” “Barselonany” 3:1 hasaby bilen utdy. Häzir “Real” Ispaniýanyň çempionatynda alty oýunda 13 utuk gazanyp, ikinji orunda barýar.