Hytaý kompaniýasy Apple-den patenti bozandygy üçin 1,4 mlrd dollar talap edýär

Hytaý kompaniýasy Apple-den patenti bozandygy üçin 1,4 mlrd dollar talap edýär

Emeli aň ulgamynda önümleri taýýarlamak işine ýöriteleşen Shanghai Zhizhen Intelligent Network Technology (Xiao-i) hytaý kompaniýasy Apple-i kazyýet jogapkärçiligine çekdi. Ol patent hukuklaryny bozmakda günäkärlenýän aýfonlary öndürijiden 10 milliard ýuan ýa-da $1,4 milliard möçberde töleg talap edýär. Bu barada “The Wall Street Journal” gazetine salgylanyp, vesti.ru ýetirýär.

Xiao-i Apple-den 10 milliard ýuan ($1,43 milliard) möçberinde ýeten zyýanyň öwezini doldurmagy we patenti bozýan önümleriň “önümçiligini, ulanylyşyny, satmak wadasyny, söwdasyny we importuny” bes etmegi talap edýär – diýlip, hytaý kompaniýasynyň internet torundaky habarynda aýdylýar.

Xiao-i – bu Apple Siri ýakyn bolan tehniki gurluşly ses kömekçisi üçin patenti kazyýet tarapyndan hakyky diýlip kabul edilen şanhaý firmasy. Eger-de amerikan IT-ägirdini günäkär diýip hasaplasalar, onuň “akylly” kömekçili smartfonlaryndan başlap, Apple Watch sagadyna çenli ähli elektronikasy Hytaýyň territoriýasynda gadagan edilip bilner.
Şu ýylyň iýunynda Hytaýyň Ýokary kazyýeti Xiao-i-niň wirtual kömekçi tehnologiýasyna hukugyny tassyklady. Şeýlelik bilen, 2012-nji ýyldan bäri Apple bilen bagly dowam edip gelýän kazyýet işine nokat goýuldy. Indi eger-de hytaý kompaniýasy deslapky kazyýet gadaganlygyny alyp bilse, Apple-iň Siri kömekçili ähli gurluşlarynyň satuwy Hytaýda dawa wagtynda gadagan ediler. Ýöne Xiao-i-niň patentiniň hakykylygyny tassyklan Ýokary kazyýet onuň önümi bilen Siri-niň arasyndaky tapawudy ep-esli diýip hasaplap, çözgüdi Apple-iň peýdasyna hem çykaryp biler.
Hytaý Apple üçin göwrümi boýunça ikinji söwda bazarydyr. 27-nji iýunda tamamlanan, üç aýyň içinde Hytaý Tim Kukuň firmasyna tas $9,33 milliard getirdi, bu bolsa umumy girdejiniň 16%-ini tutýar. Söwdanyň ösüşine iPhone 11 smartfonlaryna arzanladyş we ýerli ykdysadyýetiň koronawirus ýokanjyndan soň çalt dikelmegi ýardam etdi.