Nissan Motor ýapon awtoöndürijisiniň paýdarlarynyň arassa ýitgisi 2020-2021-nji maliýe ýylynyň birinji çärýeginiň jemi boýunça (30-njy iýunda tamamlandy) geçen ýyldaky 6,377 milliard ýen (60,5 million dollar) möçberindäki girdejä garşy durup, 285,59 milliard ýena (2,7 milliard dollar) barabar boldy diýlip, kompaniýanyň hasabatynda aýdylýar. Muny 1prime.ru ýetirýär.
Nissan Motor-yň girdejisi hasabat döwrüniň jemi boýunça 1,174 trillion ýena barabar boldy, bu bolsa 2019-2020-nji maliýe ýylynyň görkezijisinden iki esse azdyr. Operasion ýitgi geçen ýyldaky 1,609 milliard ýen möçberindäki (15,3 million dollar) girdejä garşy durup, 153,9 milliard ýena (1,46 milliard dollar) barabar boldy.
Bu döwürde awtomobilleriň satuwy ýyllyk aňlatmasynda 47,7%, ýagny 643 müň ulaga çenli peseldi, şunuň bilen birlikde Demirgazyk Amerikada hem görkeziji 2 esse (ABŞ-da – 49,5%), Aziýada görkeziji 49,5% (Hytaýda – 39,9%) pese düşdi, Ýewropa ýurtlarynda söwda ýyllyk aňlatmasynda 2,5 esse pese gaçdy. Ýaponiýada söwdalar 3 esse azaldy. Awtoöndürijiniň bazarda paýy 0,3%-e barabar boldy.
COVID-19 koronawirus pandemiýasynyň dünýä bazaryna ýetirýän täsirini göz öňünde tutmak bilen, Nissan 2020-nji maliýe ýylynda söwdanyň göwrüminiň peselmegine garaşýar. Maliýe ýylynyň jemi boýunça, kompaniýa 4,125 million awtomobil bilen üpjün etmegi göz öňünde tutýar.
Umuman alanyňda, häzirki maliýe ýylynyň jemi boýunça Nissan 670 milliard ýen (6,35 milliard dollar) möçberinde arassa ýitginiň bolmagyna garaşýar. Ýylyň jemi boýunça girdeji 7,8 trillion ýena (74 milliard dollar) ýeter diýlip hasaplanylýar.
Nissan Motor – Ýaponiýada uly awtoöndürijileriň biri bolup, Renault-Nissan-Mitsubishi birleşiginiň düzümine girýär. Kompaniýanyň paýnamalary sişenbe güni 4,3% arzanlady. 2020-nji ýylyň başyndan bäri olaryň bahasy 35% pese gaçdy.
