ABŞ-nyň Ýollarda hereketiň howpsuzlygy baradaky milli dolandyryş edarasy (NHTSA) 2015-nji we 2017-nji ýyllar aralygynda öndürilen Ford F-150 pikaplarynyň tehniki ýagdaýy boýunça barlag işlerine başlady. Bu barlag takmynan 1,27 million awtoulaga degişlidir.
Ulag eýeleri 6 basgançakly 6R80 awtomat transmissiýasynyň garaşylmadyk we howply hereketleri barada habar berýärler. Ýokary tizlikde barýan ulagyň karobkasy sürüjiniň buýrugy bolmazdan, öz-özünden birden birinji ýa-da ikinji tizlige geçip bilýär. Bu bolsa ulagyň birden haýallamagyna we yzky tekerleriň bentlenmegine sebäp bolup, ulagyň ýoldan çykmak (taýmak) hem-de heläkçilige uçramak töwekgelçiligini artdyrýar.
Deslapky maglumatlara görä, bu kemçilik aşakdaky sebäpler bilen baglanyşyklydyr:
- Elektrik birikmeleri: Transmissiýanyň içindäki tok geçiriji çarçuwalaryň elektrik birikmeleri wagt geçdigiçe könelýär.
- Daşky täsirler: Ýokary temperatura we titreme kontaktlara zeper ýetirip, tizlik datçiginiň signalynyň ýitirilmegine getirýär.
- Howply ýagdaý: Ýokarylygyna yza basyp gidilende, transmissiýanyň awtomatiki usulda «neýtral» ýagdaýa geçip, pikapyň öňe tigirlenip başlaýan halatlary hem hasaba alyndy.
Käbir sürüjiler klapan bloklaryny ýa-da simleri çalşyp, bu meseläni özbaşdak çözmäge synanyşsalar-da, kemçilik köplenç gaýtalanypdyr. Ford kompaniýasy bu ýagdaýyň öňki yza çagyryşlardan tapawutlanýandygyny aýtdy. Eger federal inženerler gurluşda düýpli kemçiligiň bardygyny tassyklasalar, Ford öz taryhynda iň uly yza çagyryşlaryň birini amala aşyrmaly bolar.
