Amerikanyň Merck derman öndüriji kompaniýasy Britaniýanyň dem alyş ýollarynyň keselleriniň dermanlaryny öndüriji Verona Pharma-ny satyn alýar. Merkiň metbugat beýanatynda geleşigiň bahasynyň takmynan 10 milliard dollar töweregi boljakdygy habar berilýär.
Kompaniýa her paýnama üçin 107 dollar tölär, bu bolsa Verona Pharma paýnamalarynyň häzirki bahasyndan 23% ýokarydyr. Bu şertnama 2023-nji ýyldan - Prometheus Biosciences-iň 10,8 milliard dollara satyn alnanyndan bäri iň uly şertnama bolar.
Verona Pharma-nyň satyn alynmagy Merck-iň britan kompaniýasy tarapyndan işlenip düzülen we eýýäm ulanmak üçin tassyklanan Ohtuvayre (ensifentrin) dermanynyň hasabyna dowamly obstruktiw öýken keselini (COPD) bejermekde öz ornuny berkitmäge mümkinçilik berer. 2024-nji ýylda Ohtuvayre-iň satuwy 42,3 million dollar boldy. Seljerijileriň baha bermegine görä, onuň satuwyndan geljek ýyllyk girdeji 3 milliard dollardan geçip biler diýip, olara salgylanýan CNBC habar berýär.
Şertnama hakyndaky täzeligiň çäginde Verona Pharma-nyň paýnamalary 20,6 göterim ýokarlap, ýylyň başyndan bäri 125%-den gowrak ýokarlandy. Merck-iň paýnamalary 2,9% gymmatlady.
Merk KGaA dünýäniň iň köne derman, himiýa we biologiýa kompaniýasydyr. Ol 1668-nji ýylda esaslandyryldy we merkezi Germaniýanyň Darmştadt şäherinde ýerleşýär. Demirgazyk Amerikada bu brende EMD diýilýär. Kompaniýa gyzamyk, hapgyrtma, gyzylja, garamyk, rotawirus ýokanjy we pnewmokokk sanjymlaryny öz içine alýan köp sanly sanjym öndürýär. Derman öndüriji kompaniýanyň beýleki belli önümlerine Januvia (sitagliptin) ýaly süýji keseline garşy dermanlar we Lynparza (olaparib) ýaly rak kesellerini bejeriji dermanlar degişlidir.
