ABŞ-nyň Kongresiniň Kitaphanasynyň Milli audio-ýazgylar sanawyna 25 sany täze ses eseri girizildi. Olaryň hatarynda Microsoft Windows-yň gaýtadan işe girizilişiniň sesi, Minecraft oýny üçin saz, şeýle-de “Titanik” filminden Selin Dionyň “My Heart Will Go On” aýdymy bar.
Şeýle-de, sanawa Elton Jonyň “Goodbye Yellow Brick Road”, Chicago “Chicago Transit Authority” toparynyň “Chicago Transit Authority”, Emi Uaýnhausyň “Back to Black”, Meri Jeý Blaýjyň “My Life” we Maýlz Dewisiň “Bitches Brew” albomlary girdi.
Mundan başga-da, sanawda Brodweýiň “Gamilton” mýuzikliniň asyl ýazgysy, 1960-njy ýyldaky Dünýä beýsbol seriýasynyň 7-nji oýnunyň radio ýaýlymy we Gawaýide şeker çiňriginiň plantasiýalarynda işlän ýaponiýaly emigrantlaryň halk aýdymlarynyň ýazgysy bar.
Kongresiň kitaphanaçysy Karla Heýdeniň aýtmagyna görä, bu eserler baky saklanyp galmaga mynasyp “audio hazynalar” diýlip ykrar edildi, çünki olar ABŞ-nyň medeni kodunyň bir bölegi hasaplanýar.
Minecraft Milli sanawa girmäge mynasyp bolan taryhda ikinji wideo oýun boldy. Birinjisi Super Mario Bros bolupdy. Minecraft-dan ses ýazgysynyň sanawa girizilmegi oýnuň esasynda filmiň çykmagy bilen gabat geldi. KHBS-iň maglumatlaryna görä, 2-nji aprelde dünýä prokatyna çykandan bäri “Minecraft kinoda” filmi 344 mln dollar gazandy. Film wideo oýunlaryna esaslanan ähli filmleriň arasynda iň ýokary kassa başlangyjyny görkezdi. Ozal rekord “Doganlar Super Mario” degişlidi.
Kongresiň kitaphanasy her ýyl “medeni, taryhy ýa-da estetik taýdan ähmiýetli” 25 ses ýazgysyny saýlaýar. Sanawa on ýyldan gowrak wagt ozal çykan albomlar, aýdymlar, ýaýlym ýazgylary we çykyşlar girýär.
