Hindistan, takmynan, 1,5 mlrd adam bilen dünýäniň iň gür ilatly ýurdy hasaplanýar. Muňa garamazdan, bu ýerli häkimiýetleri çaga dogluşyny höweslendirmek üçin täze başlangyçlary öňe sürmekden saklamaýar.
India Today neşiriniň maglumatlaryna görä, ýurduň günortasyndaky Andhra-Pradeş ştatynda ýerli maşgalalary üçünji çaganyň dogulmagy üçin höweslendirmek kararyna gelindi.
Eger gyz çaga dünýä inse, maşgala 50 müň rupiýa (takmynan, 570 dollar) tölenip bilner. Eger oglan çaga dogulsa, onuň ene-atasy sygyr alar. Bu haýwan induizmde mukaddes hasaplanýar.
Şeýle başlangyç bilen Wizianagaram şäherinden bir deputat çykyş etdi. Ol bu başlangyjy öz jübüsinden maliýeleşdirmäge wada berdi. Ýöne Andhra-Pradeşiň ilatynyň eýýäm häzir 53,3 mln adama barabardygyny göz öňünde tutsaň, onuň pul serişdesiniň näderejede ýetjekdigi sorag bolup galýar.
India Today Hindistanyň premýer-ministri Narendra Modiniň hem ilatyň sanyny artdyrmak boýunça çäreleri görmäge çagyrýandygy belläp geçýär. Hökümet eýýäm çagalaryň sanyna garamazdan, tölegli enelik rugsadyny bermek ýaly çäreleri kabul edýär. Öň Hindistanyň dürli sebitlerinde, şol sanda Andhra-Pradeş ştatynda alty aýlyk enelik rugsady diňe ilkinji iki çaga dünýä inende berilýärdi.
