PUBG oýnunyň döredijisi Brendan Griniň düýbi Amsterdamda (Niderlandlar Patyşalygy) ýerleşýän «PlayerUnknown Productions» studiýasy «Prologue: Go Wayback!» atly täze oýnunyň ilkinji geýmpleý treýlerini hödürledi. Täze oýun emeli aň (EA) tehnologiýasynyň kömegi bilen döredildi.
Treýlerde görkezilýän pursatlar gönümel oýnuň öz prosesinden alnan. Onda oýnuň esasy mehanikalaryny, giň we täsin dünýäsini görmek bolýar.
«Prologue: Go Wayback!» diňe bir adamlyk oýun bolup, ulanyjylara uly we aňyrsyny çaklap bolmajak açyk dünýäni öwrenmäge mümkinçilik berýär. Bu dünýä EA arkaly awtomatiki usulda döredilýär. Oýunçylara täze ýerleri ýüze çykarmak, zerur resurslary ýygnamak, çylşyrymly howa şertlerine (ýagyş, gar, aşa sowuk howa) uýgunlaşmak we iň esasysy – ýeke-täk halas ediş nokady bolan howa diňini (meteowyşkany) tapmak wezipeleri berilýär.
«PlayerUnknown Productions» studiýasy bu oýny «başlangyç ädim», ýagny geljekdäki has uly we giň gerimli taslamalarynyň başlangyjy hökmünde hödürleýär. Esasy maksat – gejekde ulanyjylara giň we çylşyrymly açyk dünýäni hödürlejek «Artemis» atly köp oýunçyly (multipleýer) sandboks oýnuny döretmek hem-de bu taslamany dolandyrjak özbaşdak oýun motory bolan «Melba-ny» kämilleşdirmekdir.
«Prologue: Go Wayback!» oýny öňümizdäki tomusda Steam platformasynda elýeterli bolar. Oýnuň bahasy häzirlikçe 20 dollar diýlip kesgitlenildi.
