Awgust aýynyň ortalarynda Mecum auksionynda 1913-nji ýylda öndürilen Waverly Model 93 satlyga çykylar. Ilkibaşdan elektrikli güýç gurluşy bilen enjamlaşdyrylan bu awtoulag XX asyryň başynda elektrik ulaglaryny öndürmäge ýöriteleşen Wawerli kompaniýasy tarapyndan öndürildi.
Geçen asyryň başynda elektrikli awtoulaglar sessizdigi sebäpli, benzinli awtoulaglara garanda, has amatly we sürmek hem aňsat hasaplanýardy.
Brougham diýlip atlandyrylýan Waverly Model 93 iki adamlyk, deri diwanly we aýak goýguçly üsti ýapyk paýtun görnüşindäki elektrik awtoulagdy. Salonynda diňe iki görkezijisi bar - pedalyň golaýynda ýerleşýän wolt we amper ölçeýjiler. Ryçagyň kömegi arkaly dolandyrylýar we gaty üçegini mata bassyrma bilen çalşyryp bolýar.
2002-nji ýylda bu awtoulag wirjiniýaly Enn Roulzyň maşgalasyndan satyn alyndy. Ulag ilkibaşdan hem şol maşgala üçin çykarylan. Onuň elektrik ulgamynyň käbir bölekleriniň, şol sanda akkumulýatorynyň häzirki zaman analoglary bilen çalşyrylandygy we öý elektrik ulgamyndan zarýad almagyna mümkinçilik döredýändigi bellärliklidir. Awtoulagyň hereketlendirijisiniň takyk kuwwaty we ýöreýiş ätiýaçlygy kesgitlenmedi, ýöne XX asyryň başynda Waverli kompaniýasy zarýad bermezden 160 kilometre çenli aralygy geçjekdigini wada beripdi.
Lotuň garaşylýan bahasy entek aýan edilmedi, ýöne awtoulagyň asyl ýagdaýynda däldigini göz öňünde tutsaň, baha gaty ýokary bolmasa gerek.
