«Vision Pro» garyşyk hakykylyk enjamyny çykaranyndan gysga wagt soň, «Apple» kompaniýasy onuň üçin bahasy 299 dollar bolan ýörite «Developer Strap» aksessuaryny hödürledi. Bu barada gazeta.ru «The Verge» neşirine salgylanyp habar berýär.
«Developer Strap» «Vision Pro-ny» «Mac» kompýuterlerine birikdirmäge mümkinçilik berýän USB-C kabelidir. Bu aksessuar enjama adaty ýagdaýda ses kemeri üçin niýetlenen ýörite bölüm arkaly birikdirilýär.
«Apple» täze önümi «grafika intensiw ulanylýan ykjam goşundylaryň we oýunlaryň üstünde işlemegi çaltlaşdyrmagyň» serişdesi hökmünde hödürleýär. Port Wi-Fi birikmesi talap edilmezden, ykjam goşundylary düzmek we düzetmek ýaly meseleleri ýerine ýetirmäge mümkinçilik berer diýlip bellenilýär. «Apple» «Developer Strap-yň» faýllary geçirmäge mümkinçilik berýändigini ýa-da bermeýändigini aýtmady.
«Developer Strap-y» satyn almak mümkinçiligi diňe işläp düzüjiniň tölegli agzalary üçin elýeterlidir. Beýleki ulanyjylar aksessuary satyn alyp bilmeýärler.
«Apple Vision Pro» enjamy ABŞ-da 2-nji fewralda satuwa çykaryldy. Täze önüm şu ýylyň ahyryna çenli beýleki ýurtlaryň dükanlarynda peýda bolar.
