Türkmenistanyň Hökümeti bilen Birleşen Milletler Guramasynyň Taslamalara hyzmat etmek baradaky müdirliginiň (UNOPS) arasynda özara düşünişmek hakynda Ähtnama hem-de Türkmenistanyň Daşky gurşawy goramak ministrliginiň we Birleşen Milletler Guramasynyň Taslamalara hyzmat etmek baradaky müdirliginiň (UNOPS) arasyndaky özara düşünişmek hakynda Ähtnama gol çekildi. Bu barada ýurdumyzyň daşary syýasat edarasynyň saýty habar berýär.
Gol çekmek dabarasy 2-nji noýabrda Türkmenistanyň Daşary işler ministri Raşid Meredow bilen Aşgabat şäherine sapar bilen gelen BMG-niň Taslamalara hyzmat etmek baradaky müdirliginiň (UNOPS) köp ýurtly edarasynyň direktory Freýa fon Grooteniň arasynda geçirilen gepleşikleriň çäginde geçirildi.
Duşuşygyň dowamynda taraplar Türkmenistan bilen BMG-niň arasynda özara gyzyklanma bildirilýän hyzmatdaşlygyň ileri tutulýan ugurlaryny ara alyp maslahatlaşdylar, şeýle hem halkara taslamalaryna hyzmat etmegiň çäginde UNOPS bilen netijeli hyzmatdaşlygyň ösüşi barada pikir alyşdylar.
Taraplar saglygy goraýyş, daşky gurşawy goramak we «ýaşyl» energetika, şeýle hem hünärmenleriň hünär taýýarlygy pudagynda netijeli hyzmatdaşlygyň meselelerini ara alyp maslahatlaşdylar.
Taraplar UNOPS-yň wekilhanasynyň biziň ýurdumyzdaky işini utgaşykly alyp barmak üçin ikitaraplaýyn özara bähbitli mehanizmi döretmek barada ylalaşdylar.
