Halkara futbol federasiýasy (FIFA) we Halkara futbol assosiasiýasy geňeşi (IFAB) oýundan daşardaky ýagdaýy (ofsaýd) kesgitlemegiň täze düzgüniniň üstünde işleýärler. Bu barada Ispaniýanyň Mundo Deportivo gazeti şenbe güni habar berdi.
Täze düzgüne görä, hüjüm edýän oýunçy goranýan toparyň iň soňky oýunçysyndan, şol sanda derwezebandan dolulygyna öňde bolsa, oýundan daşardaky ýagdaý hasaba alnar. Hüjüm edýän oýunçynyň bedeniniň bir bölegi goragçy bilen bir çyzyga gabat gelende, ofsaýd hasap edilmez. Bu üýtgeşmäni ýakyn wagtda Niderlandlaryň, Italiýanyň we Şwesiýanyň aşaky ligalarynda synagdan geçirilmek meýilleşdirilýär.
Teklip edilen üýtgeşmeleriň başlangyjy FIFA-nyň global futbol bölüminiň başlygy Arsen Wengere degişli.
