Eýranyň Milli howpsuzlyk geňeşi aýal-gyzlaryň ýerli çempionatyň oýunlary wagtynda ýurduň futbol stadionlaryna barmagy baradaky meseläni tassyklady. Bu barada Eýranyň Futbol federasiýasynyň prezidenti Mehdi Taj aýtdy diýip, Bi-bi-si salgylanyp, rbc.ru belleýär.
Bu karary durmuşa geçirmek üçin ýurduň Içeri işler ministrliginiň, Sport we ýaşlar ministrliginiň, Futbol federasiýasynyň we ýörite gulluklaryň wekillerinden ybarat iş topary döredildi.
“Aýal-gyzlar “Gol Gohar”, “Sepahan”, “Zob Ahan” we “Gadir Ahwaz” ýaly stadionlardaky oýunlara gatnaşyp bilerler. “Azadi” stadiony hem taýýar bolmaly” – diýip, Taj aýtdy.
Aýal-gyzlar üçin futbol stadionlaryna barmaga gadaganlyk 1979-njy ýyldaky Yslam rewolýusiýasy döwründen bäri hereket edýärdi. Olara diňe, mysal üçin, şu ýylyň mart aýynda Russiýa bilen geçirilen dostlukly oýun ýaly aýratyn oýunlara barmaga rugsat berilýärdi.
2022-nji ýylyň awgust aýynda eýranly aýal-gyzlar 40 ýyldan gowrak wagtyň içinde ilkinji gezek Tähranda geçirilen professional futbol oýnuna baryp gördüler. 500 aýal-gyza ýerli çempionatyň “Esteglal” we “Sanat Mes Kerman” toparlarynyň arasyndaky oýna tomaşa etmek üçin “Azadi” stadionyna barmaga rugsat berildi. Aýal-gyzlaryň aýratyn sektory bardy we olar stadiona awtoulag duralgasynyň üsti bilen ýörite girelge arkaly girdiler.
