7-nji martda Türkmenistanyň Prezidenti Serdar Berdimuhamedow Döwlet howpsuzlyk geňeşiniň nobatdaky mejlisini geçirdi. Onuň dowamynda harby we hukuk goraýjy edaralaryň şu ýylyň iki aýynda ýerine ýetiren işleriniň jemlerine garaldy.
Mejlisiň dowamynda harby we hukuk goraýjy edaralaryň ýolbaşçylary garamagyndaky düzümlerde degişli döwürde alnyp barlan işler barada hasabat berdiler.
Serdar Berdimuhamedow hasabatlary diňläp, düzüm bölekleriniň işiniň döwrebap derejede guralmagynyň, goşunlaryň ähli kysymlarynyň iň täze tehniki serişdeler bilen enjamlaşdyrylmagynyň bu ugurda amala aşyrylýan özgertmeleriň möhüm ugurlarynyň biri bolup durýandygyny nygtady.
Şeýle hem Ýurdumyzyň Ýaragly Güýçleriniň Belent Serkerdebaşysy işde sanly ulgamyň mümkinçiliklerini netijeli peýdalanmak hem-de düzümiň işgärler üpjünçiligini pugtalandyrmak babatda degişli tabşyryklary berdi.
Döwlet howpsuzlyk geňeşiniň mejlisinde beýleki meselelere-de garaldy we olar boýunça degişli çözgütler kabul edildi.
