«Red Bull-yň» niderlandly sürüjisi Maks Werstappen «Formula — 1» ulag klasyndaky awtoýaryşlar boýunça dünýä çempionatynyň 20-nji tapgyrynda — Meksikanyň Gran-prisinde ýeňiş gazandy. Duşuşyk doganlar Rodriges adyndaky awtodromda geçdi.
Ikinji bolup «Mersedesden» Lýuis Hemilton, üçünji bolup «Red Bull-dan» Serhio Peres geldi.
Werstappen häzirki möwsümde 14-nji ýeňşini gazandy. Niderlandly sürüji bir möwsümde ýeňişleriniň sany boýunça «Formula-1-iň» rekordyny goýdy. Bu görkeziji boýunça ol Mihael Şumaheriň we Sebastýan Fetteliň netijelerinden öňe geçdi.
Werstappen 416 utuk toplap, şu möwsümde ýeňşini deslapdan üpjün etdi.
«Formula-1-iň» indiki tapgyry 11-13-nji noýabrda Braziliýada geçer.
