30-njy iýunda Türkmenistanyň Halk Maslahatynyň Başlygy Gurbanguly Berdimuhamedow haj däp-dessurlaryny amala aşyryp, mukaddes Mekge şäherinde gurbanlyk sadakasyny berenden soň, Jidda şäheriniň Patyşa Abdulaziz adyndaky Halkara howa menziline geldi.
Bu ýerde Gurbanguly Berdimuhamedow Jidda şäheriniň häkimi Şazada Saud bin Abdullah bin Jalawi Al Saud bilen duşuşdy.
Halk Maslahatynyň Başlygy Gurbanguly Berdimuhamedow keramatly toprakda mähirli kabul edilendikleri we gurbanlyk sadakasynyň ýokary guramaçylyk derejesinde geçirilmegi, wekiliýetiň agzalarynyň zyýaratlarynyň ýola goýulmagy ugrunda döredilen şertler üçin tüýs ýürekden minnetdarlyk bildirdi.
Şazada Saud bin Abdullah bin Jalawi Al Saud häzirki döwürde dünýäde sazlaşykly ösýän ýurtlaryň hatarynda öz ornuny pugtalandyrýan Türkmenistanyň Halk Maslahatynyň Başlygy Gurbanguly Berdimuhamedowyň ýolbaşçylygyndaky wekiliýetiň agzalaryny kabul etmegiň özleri üçin uly hormatdygyny aýratyn nygtady.
Duşuşygyň dowamynda iki ýurduň arasynda dürli ugurlar boýunça ýola goýulýan gatnaşyklaryň mundan beýläk-de iki halkyň abadançylygynyň we ýurtlaryň durmuş-ykdysady taýdan ösüşiniň bähbidine üstünlikli ösdüriljekdigine ynam bildirildi.
