13-nji sentýabrda Türkmenistanyň käbir ministrlikleriniň we pudaklaýyn dolandyryş edaralarynyň ýolbaşçylarynyň hem-de Ermenistanyň Aşgabada gelen wekiliýetiniň agzalarynyň gatnaşmagynda Ykdysady hyzmatdaşlyk boýunça hökümetara türkmen-ermeni toparynyň dokuzynjy mejlisi geçirildi.
Söwda-senagat edarasynda geçirilen mejlise gatnaşyjylar ozal geçirilen mejlisleriň jemleri boýunça gazanylan ylalaşyklaryň durmuşa geçirilişiniň barşyny, şeýle hem syýasy-diplomatik, söwda-ykdysady we medeni-ynsanperwer ugurlarda hyzmatdaşlygy giňeltmegiň mümkinçiliklerini ara alyp maslahatlaşdylar.
Söwda-ykdysady we ýangyç-energetika ulgamlarynda hyzmatdaşlygyň geljekki mümkinçiliklerine aýratyn üns çekildi.
Şeýle hem oba hojalygy, gurluşyk we binagärlik, köpçülikleýin habar beriş serişdeleri we kinematografiýa ulgamlarynda hyzmatdaşlygyň pugtalandyrylmagynyň möhümdigi nygtaldy.
Ynsanperwerlik ulgamy türkmen-ermeni gatnaşyklarynyň üýtgewsiz ugry bolup durýandygy tassyklanyldy. Şunuň bilen baglylykda, ylym, bilim, medeniýet, saglygy goraýyş, sport we syýahatçylyk ugurlary boýunça has ýakyn gatnaşyklaryň ýola goýulmagynyň möhümdigi nygtaldy.
Mejlisiň jemleri boýunça degişli Teswirnama gol çekildi.
