Geçen ýylyň sentýabr aýynda ýogyn içegesinde çiş bardygy anyklanylandan soň, ady rowaýata öwrülen meşhur braziliýaly futbolçy Pele hassahana ýerleşdirilipdi. Ol ýakyn günlerde hassahanadan çykarylar diýip, San-Paulodaky Albert Eýnşteýn adyndaky hassahananyň beýannamasyna salgylanýan Globo habar berýär.
"Onuň kliniki ýagdaýy gowy we durnukly, şonuň üçin tizara hassahanadan çykararlar" - diýip, habarda aýdylýar.
81 ýaşly Peläniň nobatdaky gezek hassahana ýerleşdirilýändigi 19-njy aprelde mälim bolupdy. Onuň saglyk ýagdaýyna hiç hili howpuň abanmaýandygy, hassahana ýatyrylmagy ýene himiýaterapiýa kursuny almak bilen bagly däldigi aýdylypdy.
Pele - futbol boýunça dünýäniň ýeke-täk üç gezek çempiony (1958, 1962,1970). Ol Braziliýanyň ýygyndysynyň düzüminde 92 oýny geçirdi we 77 gezek gol saldy. Hüjümçi Braziliýanyň "Santos"-ynda (1956-1974) we Amerikanyň "Nýu-Ýork Kosmos"-ynda (1975-1977) çykyş edýärdi.