BMG-niň Baş Assambleýasy Malaýziýany 2022-nji ýyldan 2024-nji ýyla çenli üç ýyllyk möhlet bilen BMG-niň Adam hukuklary boýunça geňeşiniň agzasy hökmünde saýlady. BERNAMA agentliginiň habar bermegine görä, Malaýziýanyň bu organda agzalygyna 183 wekil ses berdi. Muny TASS ýetirýär.
“Malaýziýa Adam hukuklarynyň ählumumy jarnamasynda berkidilen adam hukuklary boýunça global gün tertibini ösdürmek üçin BMG-a agza döwletler bilen ýakyndan hyzmatdaşlyk eder” – diýip, agentlik Malaýziýanyň premýer-ministri Ismail Sabri Ýakobyň sözlerini getirýär.
Agentligiň maglumatlaryna görä, Malaýziýa BMG-niň Adam hukuklary boýunça geňeşiniň üçünji gezek agzasy boldy. Ol bu organa 2006 – 2009-njy we 2010 – 2013-nji ýyllarda hem saýlandy.
Saýlama bäsdeşlik bolmazdan geçirildi, Geňeşe 18 dalaşgäriň hemmesi saýlandy. Malaýziýadan başga-da, bular ABŞ, Kamerun, Eritreýa, Gambiýa, Benin, Somali, Katar, BAE, Gazagystan, Hindistan, Argentina, Paragwaý, Gonduras, Lýuksemburg, Finlýandiýa, Litwa we Çernogoriýa. Umuman, BMG-niň Adam hukuklary boýunça geňeşine 47 ýurt girýär, olaryň üçden bir bölegi her ýyl gaýtadan saýlanýar.
