Ukrainaly boksçy Aleksandr Usik bilen britaniýaly Entoni Joşuanyň arasyndaky rewanş söweşi 2022-nji ýylyň fewral ýa-da mart aýynda geçirilip bilner. Bu barada Usikiň promouteri Aleksandr Krasýuk metbugat konferensiýasynda aýtdy diýip, REGNUM habarlar agentligi habar berýär.
Onuň aýtmagyna görä, söweş Kiýewde “Olimpiýa” sport toplumynda bolup biler.
“Biz Ukrainada şeýle göwrümli wakalaryň geçirilmegini isleýäris. Munuň üçin şertler diýseň kän, biz şeýle mümkinçiliklerden peýdalanmak üçin elimizden gelenini ederis” – diýip, Krasýuk aýtdy.
Ýatlap geçsek, 26-njy sentýabrda Usik Londonda geçirilen 12 raundlyk söweşde emin agzalarynyň biragyzdan karar bermegi netijesinde Joşuany ýeňdi. Netijede, 34 ýaşly ukrainaly boksçy Bütindünýä boks assosiasiýasynyň (WBA Super), Bütindünýä boks guramasynyň (WBO) we Halkara boks federasiýasynyň (IBF) wersiýalary boýunça dünýä çempiony titullaryna eýe boldy.