Ýaponiýanyň Toyota we Honda awtokonsernleri Malaýziýada koronawirus çäklendirmeleriniň güýje girmegi sebäpli, täze awtomobilleriň önümçiligini we satuwyny togtatmak kararyna geldiler. Bu barada “Nikkei” gazeti habar berdi diýip, TASS belleýär.
Toyota-nyň Malaýziýada Selangor ştatynda iki zawody bar. Honda-nyň hem ýurtda motosikl we awtomobil öndürýän iki kärhanasy bar. Malaýziýanyň häkimiýetleriniň talaplary sebäpli, awtokonsernler iş orunlarynda işgärleriň 10%-ine golaýyny goýmaly boldular, netijede zawodlaryň adaty tertipde işlemegi mümkin bolmady.
Soňky ýylyň içinde iň agyr sosial-ykdysady çäklendirmeler Malaýziýada koronawirus bilen kesellänleriň sanynyň birden ýokarlanmagy sebäpli sişenbe güni güýje girdi. Premýer-ministr Muhiddin Ýassin tarapyndan yglan edilen berk çäreler ýurduň ähli ýerinde 14-nji iýuna çenli hereket eder, şondan soň ýagdaý gowulaşsa, olaryň kem-kemden ýatyrylmagyna garaşylýar.
Maý aýynda Malaýziýada kesellänleriň sany birden köpelip başlady. Geçen hepde nobatdaky antirekord goýuldy – bir günde 9 müňden gowrak keselli. Hünärmenler muny wirusyň hindi ştamynyň ýurda ýaýramagy we koronawirus üçin barlaglaryň ýeterlik däldigi bilen düşündirýärler.